الشاعر / أحمد حسين عبد الواحد ( أحمد الطيب ) #هى_كده
زى الكارتة أم عجل
متعلقة بـ ١٠٠ حصان
وحمولها زادت و التّقَل
خلا صاحبها غضبه بان
و لما يتمادىٰ الزعل
نصرخ و نجري ع الميدان
ها نهتف بايه غير الفشل
دا صبرنا فاض من زمان
أحوال غريبة و ده مثل
الظلم فاتح البيبان
أرواح بريئة بتتقتل
معظمها زينة الشبان
ضحوا بروحهم ع الأمل
كانوا جنود و شجعان
بتسألوا إيه العمل
روحوا إسألوا مين اللي خان
سايق و ماشي و العجل
برة مسار القضبان
هى كده من غير جدل
كل شئ ظهر و بان
أوضاع بتوحي بالشلل
محتاجة صيحة مش عصيان
و الصيحة تيجي من العمل
إخلِص و سيبك من فُلان
إبدأ بنفسك يا بطل
ارفع بايدك الأذان
إنسىٰ كل اللِ حصل
حتى كمان إنسىٰ الميدان
ملعون أبوك يا كسل
إوعىٰ أشوفك بمكان
بلدك ها تُثبيت للأجل
إنك واعي من زمان
إبعد يا شعب عن الزعل
زيحه بإيدك مهما كان
( إبعد يا شعب عن الزعل زيحه بإيدك مهما كان )
بقلمي / أحمد حسين عبد الواحد #أحمد_الطيب
ليست هناك تعليقات:
إرسال تعليق