** حلم قريب **
و الحيرة فى لحظة تعيش جواك
و الخوف فى ساعاتك يبقى رفيق
اوجاع بقساوة بتسكن فيك
و لا عارف تختار اى طريق
تستنى و تغرق فى سكوتك
و دموع تتجمد فى عيونك
خيالات مجنونة بتلعب بيك
فتتوه من روحك فى ظنونك
بين حب انانى .. و عشق برئ
و الوحدة فى ليل بيطول و يطول
و نهار بيخاصم فى الايام
و انين جواك ... كره الاحلام
و كلام بيتوه من جوا كلام
و ظنون و مشاعر مجنونة
و سكوت مش لازم يبقى سلام
خيالات بتعافر مسجونة
و سهر فى ليالى ماهيش دافية
و لا صافية ... و بالخوف مسكونة
تستنى الوهم المتدارى
فى عينيك .. و عنيك لسه بتبكى
مش شايفة الدنيا على وسعها
و لا سامعة القلب اما بيحكى
فى شتات العشق و فى بحوره
و الحزن الكاين فى ملامحك
لا قدرت تكون انسان غيرك
و لا مرة رضيت حتى تسامحك
بتلوم احاسيسك و مشاعرك
على لحظة صدق اتمنيتها
على كلمة رضيت يوم تنطقها
على وردة فى يوم صدفة لقيتها
على نظرة حب سمحتلها
تسكن جواك فبقيت بيتها
على حلم قدرت تحسه قريب
و كتير و برغبة شوق عيشته
و لقيت فى حقيقتك نفسك فيه
و فى روحك بالراحة نقشته
بقلمى : فهمى على
ليست هناك تعليقات:
إرسال تعليق