***شوفوا المهزله***
بسلامته لابس سلسله
نازله على صدره مدلدله
وشعوره على ضهره مضفره
وعقله عايز صنفره
بالزمه دى مش مسخره
ايوه اخر مسخره
*************
شوفوا كمان المهزله
لابس بلوزه مشجره
وبنطلونه ساقط من ورا
ورموش عاملها مسكره
بالزمه دى مش مسخره
ايوه اخر مسخره
*************
ماشى يعاكس خلق الله
وكلب بيجره وراه
معاهوش جنيه يأكله
مستنى مصروف من باباه
وعايش حياته فشخره
بالزمه دى مش مسخره
ايوه اخر مسخره
*************
ساعات عامل شعره كانيش
والهيافه والمياصه ماتقوليش
وان قولت له روح اشتغل
يقولك ياياه مافيش
قال دورعلى شغل وميلاقيش
مستنى ماما تفطمه
بالزمه دى مش مسخره
ايوه اخرمسخره
************
قال تنه نايم طول اليوم
يصحى بعد العشا م النوم
اهله وراهم النجوم
قبل ماتظهر ف السما
وعايز ماما تفطره
بالزمه دى مش مسخره
ايوه اخر مسخره
*************
ياابنى ماتسترجل بقى
دى حياتنا محتاجه الشقى
والعالم بالعمل ارتقى
وانتوا جبتونا ورا
بالزمه دى مش مسخره
ايوه اخر مسخره
*************
ياما فيه بنات مسترجله
تلاقيها فى اى مشكله
وف ملابسها متحشمه
وفى الاداره مبهره
وفى الانوثه مافيش كده
بالزمه دى مش مبهره
ايوه كمان ومشرفه
**************
كلمات/محمد فارس ابوعمار
7/4/2016
ليست هناك تعليقات:
إرسال تعليق