ولو حاوصف
؛_________،___
حبيبتي ف حسنها قصة
ماتوصفهاش200 صورة
كتبت ديوان عن القصة
ولسة ح أخش ع القورة
حروف الشعر بتعاني
بتوصف بس مش عاجب
فاضلي كام ديوان تاني
علي ما أدخل علي الحاجب
ومش لاقي كلام يوصف
بدقة وصدق في المعني
وانا لازم أكون منصف
ومن غير ليه ولا إشمعني
حبيبتي أصلها آية
من الحسن اللي رباني
أشوفها أحس جوايا
بقلبي يقولي آه ياني
ف أتوه وارجع وأرجع أتوه
حواجب إيه يا ناس ديا
دي طبيعية ومش تاتوه
وانا شاعر وانا فنان
خلاص الشعر مش قادر
يوفي حسنها الفتان
وقبل كمان ماكون شاعر
فا انا عاشق وانا إنسان
وانا السكران وانا الولهان
وانا السهران وانا التعبان
وانا اللي ف الجمال مجنون
أجيب من فين حروف توصف
في أحلي رموش وأحلي جفون
وتحتيهم أرق عيون
أروح فيهم ولا أرجعشي
وابات في النني ماطلعشي
وأحتار هما لونهم إيه
سؤال مالقيتش رد عليه
بلاقي البحر في لونهم
وألاقي الكحل لون الليل
واشوف لون السما منهم
وزرع أخضر واشوف النيل
أتوه لو يوم مشيت بينهم
ومش واخد معايا دليل
حبيبتي عيونها محتاجة
200 تفسير و100 تقويل
وانا محتار ومش عارف
لازملي وزارة من بابها
تكون تعليم علي معارف
عشان أوصف مناخيرها
ولسة بعدها شفايف
مانيش قادر علي الأوصاف
حبيبتي جاية من الجنة
ولو حاوصف بجد أخاف
ليست هناك تعليقات:
إرسال تعليق