الثورة كانت ليه ؟
محمد ضباشه
مدن الجشع فيها
صراخ الغلابة يئن
وأصوات بلا رحمة
جوه الودان بترن
الصرخة تحرق بنارها
ألف مدنة ودير
وبطون بتلعن بجوعها
جهل أي عويل
شايف الخطوة مكسورة
وجناحها محنى بدم
والدمعة نازلة مقهورة
خايفه على الخدود تتلم
وهو مربوط في كرسي
بلون سواد الليل
بيلف زى العقارب
بمؤشر يهد الحيل
لا بيقدم ولا يأخر
وحالنا هو الحال
مهما يطول الصراخ
ما في شيء ينطال
ما عدش فينا يا بلد
كل الكلام أتقال
جيبوبنا غسلتوها ...
وبطونا قفلتوها .....
والكلمة حبستوها ...
والحرية منعتوها ...
ما خدنا منك يا ثورة
غير كتاب الموت
وعلم مصر حزين
ومغطى كل تابوت
دفنتوا فيه الأمل
ويا شباب طاهر
خرج يقول أرحموا
ريحة الفساد ظاهر
مصر مش كرسي
ولا هي تكية لحد
جهلكوا يا أهل الكراسي
فعلا يفوق الحد
دى كانت ثورة غضب
أتهز العالم ليها
وكام ميدان أتنصب
بأرواح راحت فيها
راحوا يا خسارة ببلاش
في خناقة عشان كرسي
وبرضوا بالبلطجة
هوبا ركب مرسى
وياريتكم فهمتوا بجد
أصل الحكاية أيه ؟
ولا ليه الثورة قامت
وخيبتوا أملنا ليه ؟
ولحد أمتى هنفضل
فريسة بين طرفين
وكل غلابة البلد
ما عارفين راحين على فين ؟
مين راح يمد يديه
وما يكون في يوم ظالم
وياخد الغلابة في حضنه
رب العباد عالم
ليست هناك تعليقات:
إرسال تعليق