سلم كل الأمر من ايدك لله
لما تضيق بص واتأمل في سماه
تلقى الدنيا كبيرة وواسعة
اما الهم فراح تنساه
عيش ايامك بين اخوانك
حب وود وراحة بال
تلقى الهم قوام ينزاح
حتى ولو كان تقل جبال
واوعى كمان تتمنى الشئ اللي في ايد غيرك
اوعى لترجع تكره خيرك
لكن دور في هموم كل الناس حواليك
واحمد ربك
تلقى همك قدره بسيط
تلقى الحب بيسكن قلبك
رزقك يوصل مش محتاج جري وتنطيط
حب الناس عيش واتعلم
واياك تتعود تتألم
المك ممكن يبعد عنك كل الناس
حتى قرايبك .. حتى اصحابك
حاول تجعل كل الناس حواليك احبابك
حب بجد ومش تقليد
واوعى تكون للحب عنيد
حب الناس زي حبك نفسك
ومتحرمش الناس من عطفك
زي مالغير محتاج لمساعدة
انت كمان راح تحتاج ليهم
يومها لو انت حبيب وقريب
تلقى الخير جاي من حواليهم
حب الناس
عامل كل الناس بالحب وبالاخلاص
تلقى الكل اصحاب واخوان
مش هيكون بينهم خوان
حب بقلبك مش بقلوب الناس التانية
واوعاك تنسى ان صحيح الدنيا ده فانية
مش هتدوم
لو راح تبقى لمليون عام .. لو مليار
مش راح توزن قطرة ميه من الأنهار
مش محتاجة ان الناس تكره
واكره ليه .. واكره مين؟
هو انا عارف بكرة انا راح اوصل على فين
علشان اكره .. علشان اخدع
او حتى ادور مين اجدع؟
واخدع ليه صاحبي واخونه..
علشان مال .. دهب .. الماظ؟
لو علشانهم هخدع صاحبى
يبقى الاحسن عندي قزاز
عندي حصيرة معاها مودة
احسن مالكرسي الهزاز
دنيا ايه يابني قوم فوَّق
واحدة عجوزة .. لكن للغاوي بتتذوق
عايزة تلم الناس حواليها
دنيا صحيح المكر ماليها
يلا قوام اهربوا من ايدها
روحوا لسيد الآخرة وسيدها
روحوا لله .. قولوا يا رب
ادعوا ومدوا ايديكم ليه
ادعوا ده كل الخير بايديه
ادعوا تلاقوا الشر يزول ..
والداعي لمطالبه ينول.
بقلم احمد ابوطاقه
ليست هناك تعليقات:
إرسال تعليق