الجمال معانى
*****
ياللى شاغل قلبك الخالى وليالى
نفسك إنك تلقى معنى للجمال
الحقيقه إنه صحبه من المعانى
راح تلاقيه فى الحقيقه وفى الخيال
الجمال مش بس رسمة وش صافى
الجمال تلقاه فى ضمة حضن دافى
لو هموم الدنيا فوق كتفك يشيلها
لو تضيق الدنيا يبقى الفرح كافى
الجمال فى كلمه صادقه أو حكايه
طير يطير من قلبها لقلبك إنت
بيها يعرف قلبك إنها أغلى غايه
لو تبيع الدنيا مش هتبيعها إنت
الجمال مش شعر فى لون الدهب
ولا حتى فى عين كحيله تقول بحبك
دا الجمال فى ضحكه لما تتوهب
من شفايفها تقوى نبض قلبك
دا الجمال ألف معنى ومعنى غالى
مافى مخلوق يملكه غير فى المحال
لو تلف الأرض من نازل لعالى
مش هتلقى معنى واحد للجمال.
شعر:أحمد أبو طاقه
ليست هناك تعليقات:
إرسال تعليق