اغتيال حرف
الحَرف الكامن جوايا نَصَبتهُ أمير
سَكْنتَهُ قصورى ويتواضع مع انه كبير
وجدانى دُرة على تاجهُ وشموخهُ كيان
انسان أوزانه ف أخلاقه والقافية ضمير
والحب المفرود ف بحوره يتمد سنين
يتشكل حلمه بأحساسه نبض التكوين
والمعنى ف جوفهُ سعيد مرة وف مرة حزين
وبيبنى بفرحهُ وأوجاعهُ أحزان وحَنين
بيطاوعهُ الحبر اللى ف دمهُ وكأنهُ أسير
بيسير ف عروقهُ ومعشوقهُ ساكن جواه
يتقوت من منبع روحى ويديلهُ حياة
يديله الجاه المتحنى بوحى الألهام
يتباهى بموكب كلماتهُ من غير اعلام
والخطة المدروسة ديوانهُ شُعلة تنوير
وكتير هاجموه وهانوه ف عرضهُ
من غير تفكير
نَصَبوا له مشانق على بابهُ من غير أحكام
لشموخهُ وعزة أبياتهُ طَلبوا الأعدام
ضَربوه بالنار المغلولة وكسروا الأقلام
ولأنه أمير....أكبر من أحلامهم بكتير
قام تانى وصالب ف كيانهُ بعَزم واخلاص
ولا همهُ الغدر اللى ف ضهرهُ ولا همهُ رصاص
الحرف الكامن ف كيانى نبض واحساس
وان مات الجسم واتدارى بين الأكفان
راح تبقى الكلمة ومعانيها ف قلوب الناس
ليست هناك تعليقات:
إرسال تعليق