الحاوي
حاوي و لم الناس عليه
وصرخ باعلي صوت
توووووووت تووووووووت
من يقدر ف النار يفوت
مين ياكل نار
ومن غير دموع يمشي ع المسمار
يحفر الدم في رجليه ما يقول الااااه
اكيد في كتير دايقين المر و المرار طافح
شربين السم ف العسل
ولا صوت و لا انين
ليه كده يا حاوي
علي الجرح تدوس
ومهما تقول
تووووووت...... توووووووت ...يالا تعالوااا
... ماتلاقي غير العيال
اللي لسه الهم منهم ماطال
اصل الرجال عزمهم برد من دق الطبول ع الراس
و الزمن يا حاوي لسه بيدينا دروس
وعلينا بيدوس.... اصرخ بعلو الصوت
توووووووت تووووووووت
مين يقدر يعمل بهلوان
يتلون و يرقص و قلبه حزين
يفرح الناس وعمره ما داق الفرح يومين
توووووووت تووووووووووت
يا حاوي من زمان قدرك و مكتوب علي الجبين
تلف الشوارع حافي الرجلين
وتلاقي اللي يحسدك علي لقمتك و فرحتك
و بسمتك اللي وراها دمعه تملي العين
توووووووت تووووووووووووت
حاوي ومالاقي فرحته
غير في لمه العيال عليه
و حكمه يقولها بخفته
هي دي كل دنيته وتفضل كلمته
تووووووووت توووووووووووت
حاوي جرابه لسه فيه كتير
يجري عليه الكل يسمع قصته
و يفهم عايز يقول ايه
حاوي وصرخ باعلي الصوت
تووووووووووت توووووووووووت
هدي الشريف
ليست هناك تعليقات:
إرسال تعليق